Inter do masë forcat të shtunën me Romën në orën 18.00, në kuadër të javës së 16-të të Serie A. Në prag të këtij takimi ka folur trajneri i zikaltërve, Inzaghi. Inzaghi shprehet se sfida e kësaj fundjavë është një nga më të rëndësishmet. Tekniku thotë se është i kënaqur me Lautaron, edhe pse ka vend për përmirësim. Sa i përket Mourinhos, numri një i pankinës zikaltër ndjehet i lumtur që do takojë portugezin.
Intervista:
Inzaghi, çfarë ndeshje pret nesër në Olimpico?
Nesër është një ndeshje e rëndësishme për ne, më e rëndësishmja e këtij cikli. Ne luajmë kundër një ekipi të fortë, që ka vlera të rëndësishme dhe do të duhet të bëjmë një paraqitje të kujdesshme, si një Inter i vërtetë.
Ku mund të përmirësohet Lautaro?
Duhet të vazhdojë kështu. Të mos harrojmë se është shumë i ri dhe mund të përmirësohet shumë. Jam i kënaqur me të dhe me të gjithë sulmuesit e tjerë, sepse po na ndihmojnë edhe në fazën e posedimit. Ai ka shënuar në tre ndeshje dhe shpresoj që të vazhdojë kështu.
Cili është mendimi juaj për Mourinhon?
Do të jetë kënaqësi të takoj ish trajnerin e Interit. Nuk e kam takuar dhe njohur kurrë. E di që do të jetë e veçantë për të përballja me Interin. Ne do t’i kushtojmë vëmendje edhe më shumë sepse i dimë aftësitë e tij dhe çfarë ka bërë në të gjitha klubet ku ka qenë.