Safet Gjici, presidenti i skuadrës së Kukësit është shprehur optimist për takimin e së enjtes ku Kukësi do të luajë kundër Austrisë së Vjenës, në kuadër të raundit të dytë eliminator të Europa League. Sipas tij, gjërat për takimin e ardhshëm do të ishin pak më ndryshe nëse fati do të ishte me ta pas shtyllës që Emini goditi në fund të ndeshjes në Vjenë, në sfidën e parë të luajtur mes tyre.
“Ishim të pafat në ndeshjen në Austri, që për të qenë realistë duhej të përfundonte në barazim. Nuk ka faj askush, as Emini për rastin e humbur në fund. Paraqitja e skuadrës në pjesën e dytë të lojës na jep besim se mund ta përmbysim situatën në ndeshjen e kthimit dhe pavarësisht se Austria e Vjenës është një ekip i madh. Ne të gjithë mendojmë se mund të kalojmë në turin e tretë. Nuk kemi aspak presion dhe skuadra është e qetë. I kam kërkuar lojtarëve të luajnë ashtu si në pjesën e dytë në Vjenë. Nëse shënojmë në pjesën e parë, kemi shanse të mira”.
Kreu i verilindorëve ka dhe një kërkesë për gjithë tifozët kuksianë, ku sipas tij ata duhet të jenë të shumtë në mbështetje të skuadrës së tyre, pasi Kukësi ka ditur edhe në vitet e tjera t'i bëjë krenarë ata.
“Kërkoj që tifozët të na mbështesin ndaj Austrisë së Vjenës. Jo vetëm ata që bëjnë tifo për Kukësin, por të gjithë sportdashësit, sepse me turet që kemi kaluar në Europë gjatë këtyre viteve i kemi dhënë një imazh ndryshe futbollit shqiptar. Kur luajmë në kupa, nuk përfaqësojmë vetëm klubin tonë, por të gjithë vendin. Për këtë arsye ka ndodhur që huazuam lojtarë nga Skënderbeu, Tirana na u gjet pranë për fushat stërvitore, ndërsa Federata e Futbollit dhe presidenti Duka na kanë ndihmuar me udhëtimet me çarter. Nuk bëhet fjalë për aleanca, por për bashkëpunim në të mirën e futbollit tonë. Si president i Kukësit do të bëja të njëjtën gjë nëse nuk do të luanim në Kupa do ti huazoja të gjithë lojtarët për të përforcuar ekipet që na përfaqësojnë në Europë".
Gjici ka folur edhe për lojtarët e huazuar nga skuadra e Skënderbeut. Sipas tij ky "nder" i korçarëve nuk do të thotë që do të konvertohet me lëshime në kampionat. Ata do të luftojnë për titullin kampion ashtu si Skënderbeu, Partizani dhe Tirana.
“Nuk jemi rivalë apo armiq. Me Skënderbeun, Partizanin apo edhe Tiranën jemi konkurrentë për titullin. Edhe këtë vit do të synojmë të jemi në garë, pasi kemi një skuadër cilësore. Asnjë nga lojtarët nuk largohet, as Emini për të cilin është spekuluar. Përkundrazi ne do ta përforcojmë ekipin në disa role, kryesisht në mesfushë, për të patur alternativa dhe konkurrencë. Pero Pejiç te Kukësi? Nuk ka patur biseda. Ai e ka numrin tim dhe nëse dëshiron të kthehet mund të vijë të më takojë”.
Presidenti tha diçka edhe për stafin teknik.
“Stafi, me në krye Likën dhe asistentët e tij ka punuar mjaft mirë dhe jemi të kënaqur. Mund të them se nëse e kalon edhe Austrinë e Vjenës dhe na kualifikon në turin e tretë, Hasan Lika e ka blinduar postin e trajnerit”, deklaroi presidenti i verilindorëve për "Super Sport".
Lexo gjithashtu
