Ekipi U-15 i Lushnjes është një nga ekipet më të mira në zonën e Jugut në vitet e fundit ku kanë marrë pjesë në 6 finale, 3 prej tyre të fituara . Së fundmi Lushnja U-15 ka fituar ndaj moshatarëve të Flamurtarit me rezultatin 4-0.
Ekipi i 15 vjeçarëve edhe pse disa herë në finale të kupave dhe fitues i saj, me talente të shumtë të cilët kanë arritur të luajnë me Kombëtaren U15, nuk janë pranuar të luajnë në Ligën e Profesionistëve.
Lushnja U-15 është ndaluar nga FSHF për të marrë pjesë në në Superligën e të rinjve me arsyen se nuk kanë terrenin e duhur, pavarisht kualiteteve që kanë në ekip. Trajneri i ekipit të Lushnjes U-15, Judmir Gaxheli i ka ngritur kambanat e alarmit dhe më parë, për kushtet e fushës në të cilën luajnë fëmijët e drejtuar prej tij.
Terreni ku stërviten dhe luajnë fëmijët që janë pjesë e ekipit të Lushnjes U-15, është tejet i vështirë dhe aspak normal për të zhvilluar një ndeshje futbolli. Në një terren ku bari jeshil mungon plotësisht, i gjithi tokë e thatë dhe herë herë me gropa apo beton, nuk mund të jetë kurrsesi vendi ideal për tu stërvitur duke parë efektet negative që sjell në fizikun e lojtarëve.
Në një moment kur FSHF premtonte 100 fusha futbolli vetëm në qytetin e Tiranës, në qytetin e Lushnjes fëmijë të talentuar dhe të apasionuar pas futbollit, ndoshta dhe talente të së ardhmes janë duke e mbyllur karrierën pa e filluar mirë nga kushtet e këqija që kanë.
Marrë shkas nga rezultatet pozitive si dhe grupi me disa lojtarë të talentuar për të ardhmen, të cilët kanë arritur dhe të jenë pjesë e kuqezinjve të vegjël. Një fushë sportive, e njëtrajtshme ku nuk mungon bari jeshil dhe vijëzimet, janë minimumi që mund të kenë.
Lexo gjithashtu
