Kryeministri Rama ka postuar disa fotografi të stadiumit të rikonstruktuar “Loro Boriçi”. Përpos lumturisë për këtë impiant që tashmë ka marrë pamje krejt tjetër, kryeministri nuk harron të tregojë se si ishte më përpara. Gjithashtu Rama ka gjetur momentin të shpjegojë se pse stolat e stadiumit kanë ato ngjyra.
“Për të freskuar kujtesën e disave që e kanë harruar (ose bëjnë sikur e kanë harruar) si ishte stadiumi i Shkodrës vetëm 20 muaj më parë, ja pamja e mëparshme e tribunës qendrore. dhe disa pamje të tjera që flasin vetë, për ku ishte katandisur e si ka rilindur “Loro Boriçi”.Dhe sa për ngjyrat e sediljeve që na paskan shqetësuar disa atdhetarë se u duken si ngjyrat e flamujve të huaj, u bëjmë me dije se janë ngjyrat e Vllaznisë së Shkodrës”, shkruan Rama në facebook-un e tij.
Kujtojmë që “Loro Boriçi” është stadiumi i dytë në vend i rikonstruktuar pas “Elbasan Arena”. Të dy impiantet sportive tashmë kanë kushte bashkëkohore, të cilat i ka kërkuar dhe UEFA.