Revoltohen ultrasit korçarë me FSHF-në, klubin dhe të përditshmen sportive

Zhvillimet e fundit janë përjetuar shumë nga tifozët e Skënderbeut, veçanërisht ata më fanatikë, që njihen si grupimi “Ujqërit e dëborës”. Ata kanë pasur fillimisht një reagim ndaj qëndrimit të FSHF-së në lidhje me titullin kampion të Skënderbeut, që e ka kaluar te Komisioni i Etikës. Po ashtu, tifozët korçarë, siç shkruan “Sport Ekspres”, kanë reaguar edhe ndaj klubit të tyre, që po “fle gjumë” dhe nuk e ngre zërin për sulmet që po i bëhen ekipit të zemrës nga të gjitha anët. Ata kanë kërcënuar se, nëse Skënderbeut i hiqet titulli, do ta bojkotojnë kampionatin.

PETICIONI – Lëvizja e fundit e tifozëve të Skënderbeut është mjaft e çuditshme. Ata kanë menduar t’i drejtohen bashkisë së qytetit me një peticion, duke kërkuar shpalljen “non grata” të gazetës së përditshme sportive “Panorama Sport” në qytetin e tyre. Diçka që nuk ka ndodhur më parë, por tifozët e Skënderbeut janë mjaft të irrituar, me sa duket, me qëndrimin  e kësaj gazete në numrin e sotëm dhe jo vetëm për ekipin korçar.