Presidenti i Tiranës, Refik Halili gjatë diskutimit për buxhetin në futbollin shqiptar në Asamblenë e Përgjithshme të FSHF-së ka bërë kërkesë për t'u rritur fondi i akorduar për ekipin kampion në Superligë dhe për skuadrën fituese të Kupës së Shqipërisë.
Një tjetër kërkesë e Halilit ishte edhe rritja e të ardhurave që klubet përfitojnë nga të drejtat televizive.
Këtyre kërkesave, presidenti i FSHF-së, Armand Duka u shpreh: "Sugjerimi i parë, nuk është futur në rendin tonë për këtë vit. Por, do të jetë një objekt diskutimi për Asamblenë e ardhshme, padiskutim që po.
Për sa i përket të drejtës televizive, 100% e shumës që FSHF arkëton nga ato i janë shpërndarë klubeve. Përveç kësaj, edhe FSHF-ja vendos të ardhura shtesë në këtë 'paketë' për t'ua dhënë klubeve.
Fondi që jep shoqëria që ka të drejtën për të transmetuar ndeshjet e kampionatit shqiptar, e kuptoj se është i ulët, por ka pasur rritje në krahasim me vitet e kaluara", deklaroi Duka në lidhje me kërkesat e presidentit të Tiranës, Refik Halili.
Lexo gjithashtu
