Finale i kanë cilësuar drejtuesit e Dinamos sfidat play-off për promovimin në Superligë. Pas një dekade në hije, Nëndetësja e ka vetë në dorë të dalë në dritë teksa të shtunë në Kompleksin Internacional janë si miq të Vorës.
Kundërshtarët e Dinamos janë pa objektiva, teksa sfida nuk duhet të nënvlerësohet pasi gjatë kampionatit Vora e mposhti 1-0 Dinamon duke komplikuar pozitat. Të gjendur katër pikë më shumë se Burreli ndjekës, dinamovitët do duhet të fitojnë përballjen e së shtunës për të qenë zyrtarisht në Superligë sezonin që vjen. Ndaj Vorës është vërtet një finale, për të shkuar në përballjen e fundit me Burrelin rival të relaksuar.