Federata Shqiptare e Futbollit ka njoftuar se ndeshja e femrave mes Vllaznisë dhe Apolonisë e cila ishte programuar të zhvillohej si testuese për “Arenën Kombëtare”, është shtyrë për fundjavën e ardhshme. Është FSHF-ja që përmes një njoftimi në kanalin zyrtar bën me dije:
“Federata Shqiptare e Futbollit dëshiron të informojë opinionin publik se ndeshja e kampionatit të femrave, Vllaznia-Apolonia, e planifikuar për tu luajtur në stadiumin e ri kombëtar ditën e dielë, datë 3 Nëntor, ora 19:00, do të spostohet për të dielën e ardhshme.
Duke qënë se është kryer një rimbjellje e fushës për periudhën e dimrit, pas konsultave me kompaninë greke e cila ka kryer shtrimin dhe mirëmbajtjen e tapetit të fushës, u vendos sëbashku me zbatuesin që ndeshja të spostohet për të pasur një fushë në gjëndje optimale në prag të ndeshjes inaguruese që do të zhvillohet më datë 17 Nëntor, kundër Francës.
Duke kërkuar mirëkuptimin tuaj, dëshirojmë t’ju bëjmë me dije se biletat e shpërndara për ndeshjen testuese mund të përdoren në datë 10 Nëntor”.
Kujtojmë që Armand Duka ka deklaruar që inaugurimi i këtij stadiumi do të bëhet vetëm me datën 17 nëntor. Sipas tij asgjë s’mund ta ndryshojë këtë datë, veç forcave të mbinatyrshme.