Nelson Hysa e ka marrë seriozisht betejën me gjermanin Agit Kabayel. Pasi e sfidoi në një përballje kokë më kokë pas duelit që fitoi ndaj rivalit norvegjez Thomas Narmo, boksieri shqiptar e ka shtrirë sfidën në rrjetet sociale, ku i kërkon Kabayel të pranojë të përballet me të në ring.
“Pranoje sfidën time, Agit. Po vij në Gjermani të të marrë çfarë është e jotja dhe të bëhem kampioni i ri në peshat e rënda të WBC World. Do ta mbush stadiumin plot me shqiptarë dhe do të tregojë ekzaktësisht pse jam peshërëndësi më i frikshëm i botës. Gjermani, a jeni gati?”, ka shkruar në profilin e tij boksieri Hysa.
Kujtojmë se përballja e fundit e boksierit shqiptar rezultoi një sukses historik. Hysës i mjaftuan vetëm dy raunde për të rrëzuar me knock-out rivalin nga Norvegjia, duel i zhvilluar ditën e shtunë, teksa të martën ai u prit nga kryeministri i Shqipërisë, Edi Rama.
Liderit të qeverisë, Nelson i dhuroi dorezat e boksit, ndërsa boksierin shqiptar, vetë Rama e klasifikoi si “Shqiponjën shqiptare” që nuk njeh humbje.
Lexo gjithashtu
