Kategoria e Parë e futbollit do të zhvillojë dy javët e fundit për të vendosur verdiktet sezonalë. Teksa shumë skuadra i kanë marrë përgjigjet, ka edhe klube që bëjnë projektet e së ardhmes. Një ndër ta është Egnatia e Rrogozhinës që po projekton në stol Gugash Maganin. Peqinasi u largu nga Besa përpara pak muajsh dhe prej asaj kohe është i përfolur në disa skuadra.
I njohu për eksperiencën dhe qetësinë në drejtim, ish-trajneri i disa skuadrave në Kategorinë Superiore duket se do vijojë të drejtojë në Kategorinë e Parë. Në fundjavë Magani ka qenë prezent në sfidën mes Dinamo dhe Egnatias (1-0), ndërsa trajneri shihet si i duhuri nga rrogozhinasit për një projekt serioz për ngjitjen në Elitën e vendit në futboll. Verë e nxehtë pritet të jetë edhe sa i takon pankinave të trajnerëve në futbollin shqiptar.