Merkato kampione, ja cilat janë dy goditjet finale!

Çdo ditë te Skënderbeu ka të paktën një prezantim. Situata u përmbys shumë shpej dhe meraku i tifozëve korçarë pas largimit të disa titullarëve ia ka lënë vendin optimizmit për një ekip më të madh, sepse konfirmimet janë të rëndësishme dhe blerjet cilësore. Qëndrimi i Hamdi Salihit i ka lumturuar të gjithë, ndërkohë që afrimi i lojtarëve si Fukui, Idrizaj, Mustafa dhe së fundi Gavazaj, e forcojnë ndjeshëm ekipin. Megjithatë, presidenti Takaj ka gati edhe dy  goditje finale në merkato për ta quajtur plotësisht të kompletuar grupin. Te Skënderbeu priten një mesfushor organizator dhe një mbrojtës qendre ose i majtë. Ditët e fundit është përfolur emri i Jurgen Gjasulës, por ka mbetur në kuadrin e diskutimeve dhe ndoshta presidenti Takaj mund të ketë një tjetër “kartë| për atë që do të jetë pasuesi i ish-kapitenit Shkëmbi në fushë . Po ashtu, korçarët po kërkojnë edhe një mbrojtës, pasi në këtë repart nuk ka shumë alternativa, pas ikjes së Vangjelit dhe Arapit, si dhe vështirësive në afrimin e Fejzullahut.