Lushnja ndeshet me ekipin e Valbonës në stadiumin “Roza Haxhiu” ku u luajt Klasikja e futbollit shqiptar këtë mesjavë. Takimi fillon në orën 14:00 dhe të dyja ekipeve iu kujton një sfidë para 2 vitesh.
Pikërisht para 2 sezonesh po këto dy klube ndesheshin me njëra-tjetrën në “Elbasan Arena” në një ballafaqim direkt që nuk kishte ndeshje kthimi. Ai takim shikonte Lushnjën me synimin për qendrim në Kategorinë e Parë dhe shmangien e një turpërimi të mundshëm, teksa në krahun tjetër shikonte një Valbonë të ringritur nga hiçi dhe që kishte ambicie për t’u ngjitur mes emrave më të mirë të futbollit në vendin tonë.
Sigurisht në atë edicion fitoi ekipi nga qyteti i Lushnjes me rezultat 1-0, por ka kaluar kohë dhe tani skuadrat janë komplet ndryshe. Tropojanët ia dolën të ngjiteshin më vonë edhe pas atij hidhërimi ndaj lagunarëve dhe po mundohen të bëjnë mirë në këtë kategori. Lushnjarët kanë ndërruar trajner dhe kërkojnë të hedhin pas të shkuarën dhe sidomos atë humbje të cilësuar si të pamerituar ndaj Flamurtarit në mesjavë.
Klubi nga Myzeqeja është rritur ndjeshëm në paraqitje në 2 sfidat e fundit dhe kjo duket dukshëm në fitoren me “manita” ndaj ekipit tjetër verior të Kukësit. Po këtë gjë do të tentojë nesër skuadra e drejtuar nga Xhafa në 1 ndeshje aspak të lehtë kundër ekipit nga Tropoja.
Lexo gjithashtu
