Besa e Kavajës, është një ekipi pretendent, për tu ngjitur në Superiore, pasi deri tani po bën një sezon fantastik, duke qenë në vendin e dytë, me 26 pikë, katër më pak se Bylisi. Diferencat në një kampionat si ky, nuk thonë asgjë, pasi lufta është deri në fund dhe asgjë nuk sigurohet që në fazën e parë.
Ekipi i Kavajës, ka dhe lojtarë shumë të mirë që tërheqin vëmendjen. Albi Çekiçi, është një sulmues që e mban ekipin mbi shpatulla dhe ndihmon skuadrën për ngjitjen në Superiore.
26-vjeçari është i bindur tek skuadra dhe ngjitja në Superiore, madje nuk e vë aspak në dyshim. Në një intervistë për newsport.al, Çekiçi ka rrëfyer objektivat e skuadrës, pikat e tij të dobëta dhe të forta, madje edhe për Liverpoolin e Klopp-it.
– Besa momentalisht po bën një sezon shumë të mirë, si mendoni a do arrini në fund për të mposhtur konkurencën me Bylisin për t’u ngjitur ju, në Superligë?
Besa është e sigurt që do të ngjitet në Superligë. Bylisi është një ekip që s’na ka fituar asnjëherë. Ndeshjet që kemi luajtur përballë janë në favorin tonë.
Jemi për Superiore edhe do ia arrijmë me çdo kusht.
– Ju keni disa vite që luani në Kategorinë e Parë, çfarë është ajo që e bën interesante këtë kampionat?
Po e vërtetë është, kam vite që luaj në Kategorinë e Parë. Interesant është fakti që këtë vit ka më shumë konkurencë. Unë si asnjeherë më parë kam veshur fanellën e Besës, që dihet historia e saj. Ka shumë ekipe që kërkojnë të ngjiten në Superligë, por një gjë ta kenë të sigurtë, është vetëm Besa kampione këtë vit.
– Pozicioni juaj në fushë, varet shumë nga topat që vijnë në zonë, ju a po furnizoheni aq sa duhet nga shokët e skuadrës?
Pozicioni im është të shënoj. Aq topa sa të vijnë, duhet dhe dua t’i shënojë gol, për ekipin dhe të mirën ekipit.
– Një lojtar si ju që po spikat në të Parën, ka pasur oferta nga Superliga apo nga ekipe të së njëtës Kategori?
Kam pasur në fillim të verës, por vendosa t’i bashkohesha Besës së Kavajës për ambiciet që tregon si skuadër apo si klub dhe jemi në rrugën e duhur.
– Në Superligë cili është ekipi që i’u bind dhe sulmuesi që të pëlqen më shumë ?
E ndjek shumë pak Superligën. Nuk kam ndonjë lojtar të preferuar nga Superliga, më pëlqen të përqëndrohem tek vetvetja.
– Cili mendoni se është avantazhi juaj në zonë përballë mbrojtësave kundërshtarë dhe cila cilësi e juaj ka nevojë për përmirësim?
Avantazhi im është shpejtësia dhe forca. Gjëja që do të përmirësoja është loja në ajër, do doja të shënoja më shumë gola më kokë.
– Në arenën europiane cili ekip iu pëlqen në mënyrën si ndërton aksionet dhe futet në zonë?
Unë jam tifoz i Interit, por nga loja sulmuese më pëlqen Liverpooli i Jurgen Klopp-it. Ka një sulm fantastik, siç po bën një sezon fantastik./ Marsel ALLIAJ/
