Ekskluzive/ Privatizohet Luftëtari, presidenti Tavo shpall objektivat

Luftëtari nuk është më në pronësi të Bashkisë së Gjirokastrës, por tashmë do të ketë një president me të drejta të plota nga fusha e biznesit. Grigor Tavo, një emër i njohur i sportit në Gjirokastër ka hedhur dorën për të drejtuar këtë klub dhe për të mirëorganizuar atë, duke u kthyer nga një donator i thjeshtë në një president për ekipin bluzi.

Ekipi kampion i Kategorisë së Parë për sezonin 2015-2016

Për Luftëtarin është marrë vendimi në Këshillin Bashkiak të Gjirokastrës që të kalojë nga pronësia e bashkisë në atë të zotit Tavo, ndërsa mbeten dhe disa procedura të tjera që skuadra të kalojë plotësisht në shoqëri aksionere, por kjo nuk pengon drejtuesit e rinj të vijojnë punën me synimet që kanë.

Prej disa ditësh kanë nisur përgatitjet, të cilët po arrijnë kulmin e tyre, ku shumë të rinj të ardhur në provë janë larguar dhe të tjerë kanë mbetur për t’u vëzhguar. Ndër të tjera, i intervistuar nga “Newsport.al”, zoti Tavo tregon me detaje organizimin e ekipit të tij për pjesëmarrjen në Superiore.

Si ndihet zoti Tavo tashmë që është me të drejta të plota president i Luftëtarit?
Bashkia dje mori vendimin për ta kthyer klubin në shoqëri aksionere. Pasi të zbardhet vendimi do të bëjmë procedurat për të ndërtuar sh.a. Si fillim u morr vendimi i Këshillit Bashkiak dhe do të vazhdojmë punën për atë që kemi menduar. Kemi nxjerr vendim për stadiumin, në mënyrë që të bëhen punimet e kërkuara ku edhe federata ka sjell investimin e saj, por edhe ne si klub do të bëjmë më të mirën. Normalisht që ndihemi mirë, por duhet të ecim me baza të forta që si fillim të bëjmë punë serioze.

Si do të jetë Luftëtari i këtij viti?
Shpresojmë që të bëjmë ekip të mirë dhe të mbijetojmë në radhë të parë dhe çtë dalë rrugës le të jetë fati jonë. Do të përpiqemi që të bëjmë ekip të mirë. Jemi të vetëdijshëm që kemi shumë punë për të bërë. Jemi akoma në merkato.

Mladen Milinkoviç, trajneri i Luftëtarit

Ku do të fokusohet merkato e klubit tuaj?
Kemi afruar lojtarë nga viti i shkuar dhe shumë të tjerë janë në provë. Janë të rinj që pretendojnë për të veshur një fanellë të skuadrës tonë, por trajneri do të vendosë për fatin e tyre. Ata zhvilluan një ndeshje sot dhe për dy tre ditët e ardhshme do të ketë sërish seleksionime. Do të vendosim të hënën kë do të mbajmë nga këta që kemi e më pas do të hyjmë në merkato për lojtarë me potencial. Pranoj se jemi në tentativa për të afruar tre katër lojtarë të huaj. Nuk i kemi mbyllur përfundimisht, ndaj nuk mund të zbuloj emrat.

Të huajt në çfarë pozicionesh konsistojnë?
Në çdo repart nga një i huaj. Nuk mund t’i mbledhim vetëm në një pozicion apo në dy të tillë.

Pa nisur kampionati, keni një parashikim se ku do të renditet ekipi juaj?
Nuk mund të flas për të ardhmen. E para është që ne po organizohemi dhe e kemi marrë seriozisht që të bëjmë ekip të mirë, pastaj deri në fund të vitit nuk parashikohet se çfarë do të bëhet. Kemi mbështetjen e sportdashësve, të bashkisë së Gjirokastrës, të gjithë ambientit në përgjithësi. Ne po bëjmë punën tonë me seriozitet dhe të arrijmë atë që duam.