Përleshja në stadiumin e Korçës ditën e djeshme në sfidën mes Skënderbeut dhe Partizanit duket se ka detyruar FSHF-në të ndryshojë qëndrim në lidhje me prezencën e policisë në stadiume gjatë ndeshjeve të kampionatit.
Vetëm disa ditë pas vendimit të bujshëm për të lënë policinë jashtë impianteve, e duke detyruar klubet të garantojnë sigurinë e ndeshjeve me polici private, sot sekretari i përgjitshëm i FSHF-së Ilir Shulku i është drejtuar me një shkresë zyrtare Policisë së Shtetit për të riparë edhe një herë rolin e tyre në stadiume e duke i rikthyer forcat e rendit brenda rrethimit të impianteve.
Shkresa e plotë e Sekretarit të FSHF-së, Ilir Shulku:
Të nderuar zotërinj!
Duke marrë shkas nga incidentet e ndodhura në ndeshjen e javës së parë të kampionatit të futbollit “Kategoria Superiore”, Federata Shqiptare e Futbolli, ju drejtohet për të sjellë në vëmendjen tuaj çështjet e sigurisë së tubimeve sportive.
Në vijim të korrespondencës midis dy institucioneve tona, FSHF dhe anëtarët e sajë, janë duke marrë masat të vazhdueshme për përmirësimin e kushteve të sigurisë në impjantet sportive. Këto masa, përfshijnë ndër të tjera njoftimin e policisë së shtetit me shkrim të paktën shtatë ditë kalendarike përpara zhvillimit të ndeshjes, me qëllim planifikimin e të gjitha masave të nevojshme të sigurisë për mbarëvajtjen e saj. Në këtë njoftim, klubet anëtare do të përcaktojnë edhe shërbimin privat të sigurisë fizike (SHPSF) të kontraktuar për marrjen e masave të sigurisë në mjediset sportive.
Sakaq, konform parashikimeve të nenit 51 të Ligjit “Për Sportin” ruajtja e rendit dhe e sigurisë publike në mjediset sportive është detyrë institucionale e organeve të Policisë së Shtetit, për këtë arsye do t`ju luteshim që në zbatim të kësaj dispozite, të angazhoheni për të garantuar sigurinë e ndeshjeve përmes prezencës së forcave të rendit në të gjitha impiantet sportive.
Incidenti në stadiumin “Skënderbeu” Korçë, dëshmoi se prezenca e policisë së shtetit brenda mjediseve sportivë është më shume se sa e domosdoshme për garantimin e sigurisë publike dhe parandalimin agravimit të situatave. Sa më sipër edhe për vetë faktin se forcat e rendit, gjithsesi janë gjithnjë të pranishme gjatë zhvillimit të ndeshjeve jashtë rrethimit të stadiumeve.
Me besim në një reagim pozitiv nga ana juaj.
Ilir Shulku