Humbja e Partizanit 4-0 kundër Kukësit ka lënë shije të hidhur në skuadrën e kuqe. Tashmë ambienti është i trazuar dhe atmosfera pozitive që ekzistonte para 3 ditësh, nuk është më. Të gjithë nën zë shfryjnë për atë që ndodhi me verilindorët, por ajo që nuk kapërdijnë lojtarët është deklarata e trajnerit Klevis Dalipi pas ndeshjes ku ia faturoi fajin vetëm futbollistëve duke dalë vetë i “larë”.
Drejtuesit e kuq i kanë dhënë besimin sërish teknikut të kuq, madje dje presidenti Gaz Demi i ka inkurajuar lojtarët për të parë vetëm përpara. Por, a mund të shihet para nëse në skuadër ka presion? Sigurisht që jo. Të gjithë janë të sigurtë, janë të bindur se drejtuesit po lëvizin dhe në fund të këtij edicioni do të “priten koka” ashtu si në janar.
Dikush duhet të mbajë përgjegjësi për atë që ndodhi. Ashtu si në humbjen me Luftëtarin, edhe kjo disfatë me kuksianët nuk do të kalojë kaq lehtë. Në klub po përgatiten për merkaton, por fillimisht për atë në “dalje”. Me siguri që edhe vetë trajneri Klevis Dalipi e ndjen rrezikun.
Mund të ketë fituar eksperiencën me shumë trajnerë shqiptarë dhe të huaj që ka punuar, megjithatë kjo nuk mjafton për të drejtuar Partizanin e “madh” siç ai e tha pas ndeshjes me Kukësin. Kolegët e tij e kritikuan për fjalët pas sfidës.
Lideri s’mund të zhbëhet, përkundrazi është ai që duhet të mbajë lart flamurin deri në fund. Partizanët ranë në fushën e betejës, po “komandanti” ku ishte? A thua vallë të ketë shpëtuar nga kjo betejë? Me siguri që jo… Koha do ta tregojë! /Newsport.al/
