Pas humbjes së tretë në këtë sezon me Partizanin, midis trajnerit të Kukësit dhe sulmuesit Reginaldo Faite nisi një përplasje e hapur për rënien e performancës në fushë të futbollistit nga Mozambiku. Fillimisht u mendua se do të merrej një masë disiplinore ndaj afrikanit nga ana e klubit, por tensioni mes palëve tashmë është shuar. Drejtori sportiv i Kukësit, Nderim Nexhipi ka komunikuar personalisht me secilin prej tyre duke u kërkuar të lënë mënjanë mosmarrëveshjet dhe t’i rikthehen punës.
Cungu ka pranuar ta falë Reginaldon, por nëse reagimi i sulmuesit përsëritet sërish ai dhe klubi nuk do ta tolerojnë. Nga ana tjetër, vetë afrikani pranoi se u shpreh në mënyrë të revoltuar i prekur nga fjalët e Cungut. Ndërmjetësimi i palëve është bërë me kërkesë të presidentit Safet Gjici, i cili këmbëngul që skuadra të mendojë vetëm për ndeshjet dhe kampionatin.
Klubi pret që të qetësohet klima e rënduar pas goditjes së fortë që pësoi nga humbja me Partizanin dhe sfida e radhës në kampionat me Kastriotin do të testojë dhe frymën brenda skuadrës.